మోదీ, ఎన్నికల ప్రధాన కమిషనర్‌ను ఎందుకు కాపాడుతున్నారు
న్యూఢిల్లీ, అక్టోబర్ 12(ద్రణ):- దేశ రాజధాని ఢిల్లీలో యువత చేపట్టిన నిరసనలను అడ్డుకోవడంపై కాంగ్రెస్ అగ్రనేత రాహుల్ గాంధీ తీవ్ర విమర్శలు చేశారు. యువతకు తమ నిరసనను తెలిపే స్వేచ్ఛ ఎందుకు కల్పించడం లేదని ఆయన ప్రశ్నించారు. నిరసనలను అడ్డుకునేందుకు ఢిల్లీలో దాదాపు 30 వేల మంది పోలీసులను మోహరించి భయానక వాతావరణాన్ని సృష్టించారని ఆరోపించారు.
బీజేపీ, ఆర్‌ఎస్‌ఎస్‌ కార్యకర్తలు మహిళలు, యువతపై దాడులకు పాల్పడుతున్నారని రాహుల్ గాంధీ విమర్శించారు. ప్రజాస్వామ్యంలో నిరసన తెలిపే హక్కు ప్రతి ఒక్కరికీ ఉందని పేర్కొంటూ, యువత గొంతును అణచివేసే ప్రయత్నాలు ఎందుకు చేస్తున్నారని ప్రశ్నించారు.
ప్రధాని నరేంద్ర మోదీ, ఎన్నికల ప్రధాన కమిషనర్ జ్ఞానేశ్ కుమార్‌ను ఎందుకు కాపాడుతున్నారని రాహుల్ గాంధీ నిలదీశారు. జ్ఞానేశ్ కుమార్ రాజీనామా చేసే వరకు తమ పోరాటాన్ని విరమించబోమని స్పష్టం చేశారు. ఎన్నికల సంఘాన్ని ప్రక్షాళన చేసి, ఎన్నికలు నిష్పక్షపాతంగా జరిగేలా చర్యలు తీసుకునే వరకు ఆందోళన కొనసాగిస్తామని ప్రకటించారు.
ఎన్నికలలో అక్రమాలు జరుగుతున్నాయని ఆరోపించిన రాహుల్ గాంధీ, ఎన్నికల ప్రక్రియలో పారదర్శకత, నిష్పక్షపాత వైఖరి ఉండాలని డిమాండ్ చేశారు. యువత నిరసనలను అడ్డుకోవడం, ఎన్నికల సంఘం వ్యవహారశైలిపై తమ ఆందోళనలను ప్రజల్లోకి తీసుకెళ్తామని ఆయన పేర్కొన్నారు.