తీరొక్క పూలతో బతుకమ్మల పేర్పు..
ఆటపాటలతో మహిళల సందడి..
నగరంలో పూలకు పెరిగిన డిమాండ్‌
హైదరాబాద్‌, అక్టోబర్ 10(ద్రోణ):- తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ సంబరాలకు భాగ్యనగరం సిద్ధమవుతోంది. ఎంగిలిపూల బతుకమ్మతో తొమ్మిది రోజుల పూల పండుగకు మహిళలు శ్రీకారం చుట్టనున్నారు. ప్రకృతిని ఆరాధిస్తూ, తీరొక్క పూలతో బతుకమ్మలను పేర్చి గౌరమ్మను పూజించేందుకు ఆడపడుచులు ఉత్సాహంగా ఎదురుచూస్తున్నారు. బతుకమ్మ పాటలు, కోలాటాలు, సంప్రదాయ నృత్యాలతో నగరంలోని వీధులు, కూడళ్లు పండుగ శోభను సంతరించుకోనున్నాయి. తంగేడు, గునుగు, బంతి తదితర రంగురంగుల పూలతో బతుకమ్మలను అందంగా పేర్చి, వాటి చుట్టూ చేరి మహిళలు ఆటపాటలతో సందడి చేయనున్నారు. సంప్రదాయబద్ధంగా పూజలు నిర్వహించి బతుకమ్మను సాగనంపేందుకు ఏర్పాట్లు చేసుకుంటున్నారు. ముఖ్యంగా ట్యాంక్‌బండ్‌, కూకట్‌పల్లి, సరూర్‌నగర్‌, సికింద్రాబాద్‌ పరిధిలోని బోయిన్‌పల్లి తదితర ప్రాంతాల్లో మహిళలు పెద్ద సంఖ్యలో పాల్గొని బతుకమ్మ వేడుకలను ఘనంగా నిర్వహించనున్నారు.
పూలకు పెరిగిన డిమాండ్‌
బతుకమ్మ పండుగ నేపథ్యంలో నగరంలో పూలకు డిమాండ్‌ పెరుగుతోంది. బతుకమ్మలను పేర్చేందుకు అవసరమైన తంగేడు, గునుగు, బంతి తదితర పూల కొనుగోళ్లపై మహిళలు దృష్టి సారిస్తున్నారు. దీంతో పూల మార్కెట్లు, విక్రయ కేంద్రాల వద్ద సందడి నెలకొంటోంది. రంగురంగుల పూలతో బతుకమ్మలను అందంగా అలంకరించేందుకు మహిళలు పోటీపడుతుండటంతో పూల విక్రయాలు పుంజుకుంటున్నాయి.
తెలంగాణ ఆడపడుచుల ఆత్మీయతకు, ప్రకృతి ఆరాధనకు, సంస్కృతీ సంప్రదాయాలకు ప్రతిబింబంగా నిలిచే బతుకమ్మ పండుగ.. ఎంగిలిపూల బతుకమ్మతో ప్రారంభమై నగరమంతా పండుగ వాతావరణాన్ని నింపనుంది. మహిళల సమష్టి భాగస్వామ్యంతో భాగ్యనగరంలో బతుకమ్మ సంబరాలు అంబరాన్ని తాకనున్నాయి.